UNIVERSITEIT VAN PRETORIA

28 Junie 1988

Prof W A Landman
Krugerlaan 88
LYTTELTON MANOR
0157

Geagte professor Landman

BENOEMING AS PROFESSOR EMERITUS

Dit is vir my 'n genoeë om u mee te deel dat die Raad op sy jongste vergadering besluit het om u tot Professor Emeritus te benoem. Met hierdie eer wat u te beurt val, wil ek u van harte felisiteer. Die voorregte hieraan verbonde behels die volgende:

1. U lidmaatskap van die Biblioteek, met al die voorregte daaraan verbonde, bly behoue.

2. As Professor Emeritus sal u steeds na bepaalde Universiteitsfunksies uitgenooi word.

3. Indien u daarom aansoek sou doen, sal gemagtigde toegang tot die terrein van die Universiteit aan u verleen word, deur die uitreiking van 'n amptelike parkeerskyfie.

4. Toepaslike Universiteitpublikasies sal steeds aan u versend word.

5. U sal ook toegelaat word tot die gebruikmaking van die fasiliteite van die Universiteit soos deur die Rektor goedgekeur.
6. Alhoewel u in die hoedanigheid as Professor Emeritus nie lid van 'n Fakulteitsraad of die Senaat is nie, sal dit wel die geval wees indien daar verder van u dienste op akademiese vlak gebruik gemaak sou word.

7. Indien daar in die toekoms van u dienste op 'n voortgesette basis gebruik gemaak sou word, sal die bestaande Universiteitsbeleid steeds geld.

Tukkievaria 26 April 1989

'n Boekeskenking deur die voormalige hoof van die Departement Fundamentele Pedagogiek, Fakulteit Opvoedkunde, sal voortaan deel vorm van baie bruikbare studiemateriaal vir studente en dosente.

Prof Willem Landman het gedurende die 25 jaar wat hy aan die UP verbonde was, die boekery opgebou wat in die seminaarkamer op die keldervlak van die Merensky-biblioteek gehou word. Dié seminaarkamer is aan prof Landman opgedra en veral nagraadse studente sal dié boeke kan benut.

Onder dié unieke boekery is daar uitgawes van boeke wat elders onbekombaar is.

Prof Landman sê die skenking vloei voort uit sy dankbaarheid teenoor die Universiteit vir die geleenthede vir studie en akademiese prestasies wat hul aan hom gebied het.

1989 Prof Willem Landman (middel) se boekery is 'n kosbare erfenis vir UP. By hom is proff Mike Bondesio, dekaan van die Fakulteit Opvoedkunde en Flip Smit, vise-rektor: Akademies (regs) (Tukkievaria 26 April 1989)

1989 Mev Rachel Landman kyk toe hoe prof Landman een van die boeke onderteken

Kollegas en oud-studente het gister die afskeid bygewoon van prof Willem Landman, een van die reuse in die Suid-Afrikaanse onderwysgemeenskap. Prof Landman, adjunk-dekaan van die Fakulteit Opvoedkunde aan die Universiteit van Pretoria, se loopbaan in die onderwys strek oor 42 jaar, waarvan die laaste 25 jaar aan die UP. Sy uittrede beteken egter nie dat hy die onderwys nou finaal vaarwel sê nie. Hy sal in 'n tydelike hoedanigheid met sy werk by die universiteit voortgaan en hy is van plan om aan te bly as redakteur van die Suid-Afrikaanse Tydskrif vir Opvoedkunde, sowel as dagbestuurslid van die Transvaalse Onderwysersvereniging. Hy sal voortgaan met die verdere ontwikkeling van navorsingsmetodes vir die opvoedkunde.

1989 Onder die mense wat die afskeid bygewoon het is prof Mike Bondesio, dekaan van die Fakulteit Opvoedkunde aan die Universiteit van Pretoria, dr Len Scott, vise-rektor van die Onderwyserskollege Pretoria, prof Landman, dr Johnnie Hill, afgetrede departementshoof van Onderwys en Kultuursake, mnr Andries Kriek, oud-student, en mnr Koos Steyn, direkteur van die Transvaalse Onderwysersvereniging.

UNIVERSITEIT VAN PRETORIA

17 April 1989

Prof W A Landman
Departement Fundamentele Pedagogiek
Fakulteit Opvoedkunde
UNIVERSITEIT VAN PRETORIA

Geagte prof Landman

LANGDIENSTOEKENNING

Soos u bewus is, het u vyf-en-twintig jaar voltydse diens aan die Universiteit van Pretoria op 31 Desember 1988 voltooi.

Dit is die beleid dat ter waardering van sy diens, die Vise-kanselier en Rektor 'n horlosie tydens 'n Senaatsvergadering aan die betrokkene oorhandig. Dit is goedgedink om hierdie oorhandiging aan u tydens die eerskomende Senaat van 17 Mei 1989 te laat geskied. Vir dié doel moet u my asseblief so spoedig moontlik van 'n curriculum vitae voorsien.

Ek wil u vriendelik versoek om u asseblief op dié dag nie later nie as 14h00 by die Senaatsaal vir die oorhandiging aan te meld.

Met vriendelike hoogagting
Die uwe

PROF W V D M HERHOLDT
DIREKTEUR : PERSONEEL