H.D.L. Ek, die ondergetekende, predikant van die N H of G gemeente Lyttelton, verklaar hiermee dat ek mnr W A Landman persoonlik ken. Hy is lid van my gemeente waarin hy 'n lewende belang stel. Hy het spontaan aangebied om te help met ons Sondagskool en is tans een van my getroue en bekwame onderwysers. Hy is Christen en lewe sy Christelike beginsels uit. Hy is een van die ywerige offisiere van die Jan-Cilliers Voortrekkerkommando. Hier het hy reeds verdienstelike werk gelewer en getoon dat hy buitengewoon begaafd is om te organiseer. Sy vorige prinsipaal was baie jammer om hom te verloor omdat hy so 'n harde, getroue, bekwame en sistematiese werker is. Genoemde eienskappe het hy dan ook hier aan die dag gelê. Hy is lojaal teenoor sy prinsipaal en kollegas en werk hartelik en ywerig saam in en buite die skool, terwyl hy hom intussen nog verder bekwaam vir sy lewenstaak wat vir hom 'n roeping is. Met die grootste vrymoedigheid kan kinders aan sy bekwame en voorbeeldige leiding toevertrou word. Mnr Landman verdien beslis verhoging. Sonder enige voorbehoud kan ek hom aanbeveel. Sy eggenote staan hom getrou by en is self 'n aanwins in haar omgewing. D A LOUW V.D.M. Lyttelton 7 Augustus 1951

GETUIGSKRIF : MNR D J MALAN Met vrymoedigheid en genoeë kan ek soos volg van mnr W A Landman getuig : Ek ken hom sedert 1949. Hy is sedert Januarie 1951 aan die personeel van hierdie skool verbonde. Gedurende die tyd was hy vir die volgende klasse verantwoordelik: 1951 - St II, 1952 - St III, 1953 en 1954 - St IV. Mnr Landman het nog steeds uitstekende werk gelewer, pragtige resultate behaal en 'n hoë peil gehandhaaf. Hy is streng maar het steeds die heelhartige samewerking van sy leerlinge. Hy wend ook met groot welslae pogings aan om die volle samewerking van die ouers te kry. In mnr Landman se klaskamer word altyd iets nuuts aangetref. Moderne onderwysmetodes word met ywer ondersoek en in sy klas toegepas. Sy werkskemas is tot in die fynste besonderhede, les vir les, opgestel en in netjiese boeke gebind. Hy is verantwoordelik vir die voorraad van die hele skool. Hy stel baie belang in die skoolbiblioteek wat ook deur hom behartig word. Hierdie werk word op doeltreffende wyse georganiseer en behartig. Aan die buitemuurse aktiwiteite, sagtebal, atletiek, konsertwerk en voortrekkers, gee mnr Landman sy volle aandag. Hy gooi altyd sy volle gewig in en behaal steeds goeie resultate. Mnr Landman is 'n goeie organiseerder. Met hierdie gawe van hom het hy die skool en die Voortrekker Kommando by geleentheid van groot funksies uitmuntend gedien. In die samelewing staan hy as goeie Afrikaner en Kerkman sy plek vol. Mnr Landman besit, as onderwyser en persoon, daardie eienskappe wat hom op die gebied van die onderwys nog ver sal bring. Ek kan hom beslis met die grootste vrymoedigheid aanbeveel in enige verantwoordelike pos waarvoor hy aansoek mag doen. D J MALAN HOOF LYTTELTON 16 NOVEMBER 1954