Die vraag wat in die onmiddellik voorafgaande aan die hand van enkele voorbeelde beantwoord is, is waarom is dit noodsaaklik vir iemand wat sy verbintenis met sekere instansies (hier: opleidingsinrigtings) wil beskrywe, aan die geskiedenis van daardie inrigtings spesiale aandag moet gee?

Verder: Dit is die geskiedenis van 'n instansie wat besondere uniekheid aan daardie instansie verleen en dit is hierdie uniekheid wat hede- en veral toekomsbetekenis het. Verlede-opvattings stel die huidige situasie in perspektief en dra by tot begryping van die toekoms en ook die beplanning van toekomstige handelinge. Die historiese vorm 'n vertrekpunt vir die toekomstige. Begronding en regverdiging moet krities aan die lig gebring word. Aandag aan die historiese beklemtoon die menslikheid van die mens.

1. Die hoë waarde wat aan beskaafdheid geheg word

   Aktiwiteite wat daarop gerig is om 'n skooltrots te ontwikkel het opvoedingswaarde, veral omdat daardeur beskaafdheid bevorder word. Hiervoor is die skoolleuse, skoolwapen, skoollied en skoolvlag, doeltreffend aangewend. Beoefening van die kunste is een wyse om beskaafdheid te verfyn. Treffend in hierdie verband is die verfynende invloed van die skoolkore en musiekkompetisies. Die presterende skoolkoor is 'n beskaafdheidsvormer by uitstek.

2. Raaksien en waardering van individuele prestasie

   'n Geringskatting van prestasie bevorder middelmatigheid en om tevrede te wees met middelmatigheid is om selfrespek in te boet en menswaardigheid aan te tas. Waardering en beloning van prestasie kan die ontwikkeling van die presterende bewussyn ten goede kom wat kan oorspoel na ander lewensterreine. Die akademiese of sportster skitter aan die prestasie-firmament en trek welverdiende aandag en ook waardering. Presterende leerders is rolmodelle wat die sout van die skoolaarde en die pêrel in die skool se halssnoer is. Daar moet egter daarteen gewaak word dat 'n ongebalanseerde oorwaardering van die individuele prestasie nie lei tot arrogansie en selfverheerliking nie.

3. Opvoeding tot leierskap

   Die puik prestasie is die gehalteprestasie deur gehalte-mense wat die potensiaal het om toekomstige gehalte-leiers te wees. Leierskap-potensiaal moet raakgesien en ontwikkel word deur die toekenning van leierskapposisies. Vir die leier om uit te blink is om opgemerk te word en op sy beurt beteken dit om verantwoordelikheid op te neem vir die voorbeeld wat gestel moet word.

4. Agting vir die opleidingsfasiliteite

   Hierdie agting word veral sigbaar wanneer 'n gemeenskap daarna uitsien dat 'n beloofde skoolgebou opgerig gaan word, wanneer die opening plaasvind en wanneer verjaarsdae herdenk word. Vir die gemeenskap wat weet dat die gehalte van die opleidingsfasiliteite 'n opmerkbare invloed het op die kwaliteit van die onderrig en die mate waarin ontwikkelingsgeleenthede benut word, is verwagting, opening en verjaardagviering kosbare hoogtepunte. Bouwerk aan 'n beloofde skoolgebou wat goed vorder, simboliseer vir die betrokke gemeenskap verwagtinge wat besig is om uit te kristalliseer. Om die deure van 'n skoolgebou te open beteken om die poorte van die toekoms oop te maak vir die leerders. Om skoolverjaarsdae te vier is om waardering en dankbaarheid te betuig vir jare van beskaafdheidsbou en die vorming van leiers omdat die presterende bewussyn van leerders gewek is. Dit verskaf vreugde wanneer 'n opvoedingsinstelling kan terugkyk op 'n aantal jare waarin dit in stand gehou en uitgebou is en ten opsigte waarvan daar toekomsbeplanning gedoen kan word. Leerders binne sekere sektore van die onderwysstelsel wat hard gewerk het en aan 'n leerkultuur gebonde was (en dus nie die onderwys help ontwrig het nie) moet die nodige openbare erkenning en publisiteit vir hulle prestasies kry.