Terug na "Toekennings"
MOTIVERINGS VIR OORKONDES
TRANSVAALSE
ONDERWYSERSVERENIGING
21 SEPTEMBER 1984
Hy lewer as formuleerder van TO-standpunte oor algemene onderwysbeginsels en as kommentaar oor
verskillende onderwysaangeleenthede 'n waardevolle bydrae. Sy bydrae strek nie net die TO en die
georganiseerde professie tot eer nie, maar is ook van wesenlike belang vir die onderwys en
opvoeding van die Afrikanerkind.
Sy kollegas en vriende ken prof Landman as 'n warme, vriendelike mens met 'n besondere humorsin.
Sy nederigheid ten spyte van uitstaande prestasies, sy produktiewe werkvermoë en die adel wat hy
in sy dagtaak vind, gee 'n besondere persoonlikheidsdimensie aan WILLEM LANDMAN. Hy is 'n
beginselmens wat dit wat hy met die mond bely, met die daad bevestig. Sy lewe van diens betuig
nie net van geroepenheid nie, maar ook van roepingsgehoorsaamheid. Daarom is hy Godsman, kerkman,
kultuurman en volksman wie se liefde vir sy eie bo alle twyfel staan.
Prof Landman het deur sy lewe en werk getoon dat hy 'n waardige houer van hierdie toekenning sal
wees en dit is daarom vir die TO 'n besondere eer en voorreg om op so 'n wyse hulde te bring aan
'n man wat sy lewe wy in diens van die Opvoedkunde en die onderwys.
ONDERWYSKOLLEGE PRETORIA
6 Desember 1988
In die geledere van georganiseerde onderwys is hy 'n geliefde mens - 'n persoon wie se fyn
humorsin en inspirerende geaardheid kenmerkend is. Hy is daarom altyd 'n bouer van 'n gees van
samewerking - 'n ware brugbouer en verhoudingstigter.
As kundige onderwyser, onderwyskundige, opvoedkundige van faam en toegewyde opvoeder het WILLEM
ADOLF LANDMAN 'n onuitwisbare stempel op die onderwys plaas - daarom is dit 'n besondere eer en
voorreg om die hoogste toekenning van die Onderwyskollege Pretoria, die Erepenning, nou aan hom
te oorhandig.
NATALSE ONDERWYSERSUNIE
1 September 1989
Die Natalse Onderwysersunie bring hulde aan
PROF WILLEM ADOLF LANDMAN
vir
Sy bydrae tot opleiding en vorming van Afrikaneronderwysers - Die handhawing van die Christelike
en nasionale ideale in die opleidingstaak - Sy bydrae tot die intellektuele en kulturele
ontwikkeling van die Afrikanerjeug - Sy monumentale bydrae tot die georganiseerde
onderwysprofessie.
In die dampkring van sy groot gees het 'n onderwysideaal ontkiem, gegroei en gestalte aangeneem
as hoeksteen van 'n huis nie met hande gebou nie en met 'n uitsig op die Ewigheid.
Oorhandig tydens die Halfeeufeesgeleentheid.
STADSRAAD VAN CENTURION
ERETOEKENNING
Erkenning word hiermee deur die Stadsraad van Centurion
aan
PROFESSOR WILLEM ADOLF LANDMAN
verleen vir die buitengewone bydrae wat hy aan die gemeenskap van Centurion gelewer het, met
spesiale verwysing na die bydrae as geskiedskrywer van die dorp.
Prof Landman het as internasionale en erkende bekende opvoedkundige 'n reuse bydrae gelewer in
die uitbouing van die filosofie van opvoeding asook op die gebied van navorsingsmetodologie van
opvoedkunde.
Voorts word erkenning ook aan hom verleen vir die bydrae aan die plaaslike gemeenskap waar hy
oor 'n periode van 30 jaar op verskeie beheerrade van skole asook op die van die Centurion
Tegniese Koilege gedien het.
Sy veelsydigheid, wye belangstelling en betrokkenheid is kwalitatief gedemonstreer in sy jongste
bydrae wat handel oor die geskiedenis van Verwoerdburg : Pêrel van die Hoëveld (1967-1993).
Hierdie kosbare werk verbind die verlede aan die hede en bied waardevolle inligting oor die
oorsprong en ontwikkeling van hierdie besondere stad van geleenthede wat as erfenis vir 'n nuwe
generasie bewaar sal word.
Met groot respek, agting en dankbaarheid word hierdie spesiale persoon vereer vir sy besondere
betrokkenheid en interaksie met die gemeenskap en die mense binne sy invloedsfeer.
God se rykste seën en 'n vreugdevolle toekoms word hom toegewens.
RAADSHEER P E SMITH
VOORSITTER: UK
RAADSLID K J MINNIE
BURGEMEESTER
30 MAART 1999
|