Voordragte oor navorsing
Terug na Navorsing
HERBESINNING OOR DIE EENHEID VAN DIE PEDAGOGIEK (OPVOEDKUNDE)
INLEIDEND
Onder opvoedkundiges word daar af en toe gesprek gevoer oor die eenheid
van die Pedagogiek, meesal met die vooronderstelling (eksplisiet of
implisiet) dat "eenheid" 'n besondere onwegdinkbare en onweghandelbare
kriterium vir wetenskaplikheid is.
Die probleem is dat die begrip "eenheid" meesal gebruik word in die sin
van "eendersheid" en dat alle diversiteit as 'n aantasting van
wetenskaplikheid beskou word. Daar word moeilik aanvaar dat daar
bestaansreg is vir "wetenskaplik toelaatbare diversiteit".
Die stellings wat so pas gemaak is, noop die denker oor die pedagogiek
(resp. opvoedkunde) om aan die lig te bring wat as onveranderlik
(eenders) en wat as divers (verskillend) kan geld.
EERSTE SEKERHEID
Die gelykblywende van alle opvoedkunde sal in die eerste plek moet wees
die werklikheidsaspek wat onder die wetenskaplike soeklig geplaas gaan
word en dit is die opvoedingsverskynsel wat in die vorm van
opvoedingsgebeure sigbaar word in opvoedingsituasies. Denkers wat hulle
met ander verskynsels besig hou, kwalifiseer nie om opvoedkundiges
(pedagogiekers) genoem te word nie.
Die verskillende dissiplines van die Pedagogiek vorm dan 'n eenheid
omdat dit by almal om die opvoedingsverskynsel gaan maar elk op sy eie
wyse. By Fundamentele Opvoedkunde (Pedagogiek) gaan dit om die
opvoedingsverskynsel-as-sodanig (die pedagogiese an sich) en dit gee ook
aan hom die reg om te verklaar (en te demonstreer) dat hy ten aansien
van die ander pedagogiekdissiplines 'n begeleidingsfunksie het.
Vir die ander dissiplines wat saam met Fundamentele Pedagogiek 'n
Pedagogiek vorm wat gekenmerk word deur eenheid, gaan dit om die
opvoedingsverskynsel wat hom toon as opvoedingsgebeure in
(i) onderrig-leersituasies (Didaktiese Pedagogiek);
(ii) aktualisering van die psigiese lewe van leerders
(Psigopedagogiek);
(iii) situasies wat misgeloop het (Ortopedagogiek);
(iv) in verskillende onderwysstelsels (Vergelykende
Opvoedkunde);
(v) situasies waar die verwerkliking daarvan bestuur moet word
(Onderwysbestuur);
(vi) saamlewe-situasies (Sosiopedagogiek); en
(vii) verskillende historiese tydperke deur verskillende historiese
figure (Historiese Opvoedkunde).
Die volgende vraag ontstaan nou: welke verskille ten aansien van die so
pas beskryfde objeksgebied kan as toelaatbaar beskou word omdat dit nie
eenheidskendend is nie? Die volgende moontlikhede verdien oorweging:
(i) die aanname (vooronderstelling, paradigma) dat die
waarneembare daarwees van die opvoedingswerklikheid
(opvoedingsverskynsel as opvoedingsgebeure in
opvoedingsituasies) die opvoedkundige oproep tot besinnende en
ook berekenende denke daaroor, en
(ii) die oortuiging (paradigmas) dat die opvoedingswerklikheid
'n besondere deur God geskape werklikheid is wat die
opvoedkundige homself geroepe ag om te bestudeer.
Bostaande uiteensetting rym met dit wat as wetenskap gedefinieer word:
Science is concerned with what is actual and real. The actual is
necessarily related to activity. The activity is that something
which was not there before has been brought forth and revealed.
Now it is actual, ie present and out in the open. Science is the
theory of the actual. Reverence for actuality evokes the care
which strives to let something show itself as it appears. Science
places reality in a position whereby it can be governed by
scientific methods. Method has the decisive priority in such an
approach to reality. Method reigns supreme over its scientific
themes (Kockelmans & Kisiel:177-179). Phenomenolgy and the natural
sciences. Northwestern University Press. Evanston. 1970.
Die laaste gedeelte van hierdie definisie bring 'n mens by die
TWEEDE SEKERHEID
Wetenskaplike aktiwiteit ten aansien van die opvoedingswerklikheid moet
metodies, d.w.s. metodologies verantwoordbaar geskied. Dat dit so moet
wees kan afgelei word van die betekenis van die begrip "metode".
L. Methodus: G. methodos. meta + hodos - way by which: the
scientific researcher (scientist) must select a method permitting
access to the phenomenon. The method is determined to a large
extent by the nature of the phenomenon or by the sphere of
investigation. Method implies a systematic procedure in analysing
the phenomenon. After having settled the question of the
objectives of scientific practice the scientist's next step is to
decide on possible approaches that can be used to attain these
objectives. The history of methodology (the theory of methods) has
familiarised scientists with, amongst others, the following
methods: the inductive, deductive, intuitive, exemplary and the
historical methods, to mention only a few (Van Rensburg, C.J.J. &
Landman, W.A. 1986:370). Fundamenteel-pedagogiese
Begripsverklaringe. N.G. Kerkboekhandel Transvaal.
'n Metode(s) is noodwendig omdat dit
(i) toegang gee tot die opvoedingswerklikheid
(ii) sistematiese analise moontlik maak (om oppervlakkigheid
te deurbreek)
(iii) die bestudeerde werklikheid nader bring aan die wetenskaplike
sodat hy dit kan bereik.
Die metodologie-ignorerende of afwysende persoon kan nie in staat wees
tot pedagogiekbeoefening nie.
Die laaste gedeelte van die definisie van die begrip metode wys daarop
dat daar verskillende metodes onderskei kan word. Die vraag is of
metodologie-verskille by opvoedkundiges pedagogiekeenheid skend? Op
hierdie vraag kan soos volg geantwoord word. Die opvoedingswerklikheid
is 'n besonder ingewikkelde werklikheid. Die kompleksiteit daarvan
dwing die opvoedkundige om nie in 'n metode-monisme te verval nie, maar
om 'n verskeidenheid van werklikheidsgetroue metodes aan te wend.
Opvoedkundiges kan dan in 'n pedagogiekgesprek(ke) die uitkomste van die
aanwending van die verskillende metodes met mekaar vergelyk en onder
andere besin oor die integreerbaarheid daarvan d.w.s. van die kennis van
die opvoedingswerklikheid wat aan die lig gebring is.
Die eenheid van die pedagogiek (wat primêr 'n eenheid van pedagogiekers
moet wees) kan wel bedreig word indien
(i) die bestaan van meerdere perspektiewe (metodologies begrond)
op die komplekse opvoedingswerklikheid nie erken word nie;
(ii) die bestaansreg van metodes anders as die eie (gekose)
metode ontken word; en
(iii) verdagmakery en geringskatting van ander metodes
subjektivisties
(en soms emosioneel) geskied.
Dit beteken nie dat 'n opvoedkundige nie toegelaat moet word om die eie
gekose metodologie te verduidelik en te regverdig nie.
DERDE SEKERHEID
Alle wetenskap is denke (alhoewel alle denke nie wetenskap is nie). Die
eenheid van die opvoedkunde word gedien omdat die opvoedkundige gesteld
is op die beoefening van kritiese denke.
Die opvoedkundige beoefen kritiese denke met die wete dat denke altyd
denke aan iets is (bv. die opvoedingswerklikheid) en noodwendig altyd in
terme van iets is omdat dit onmoontlik is om in terme van niks te dink.
Hierdie "terme" is verwoordinge wat 'n besondere eienskap het naamlik
dat dit die opvoedingswerklikheid wat in terme daarvan bedink word, in
sy wesenlikheid laat verskyn.
Die voor die hand liggende vraag is nou, welke verskille toelaatbaar is
vanweë die nie-eenheidskendende aard daarvan? Sinvolle verskille
bestaan ten aansien van die keuse van die "terme" wat ook beligtende
denkmiddele of kategorieë genoem kan word. Die eenheid van die
opvoedkunde (pedagogiek) is geleë in die feit dat opvoedkundige denke
kategoriale denke is, en die verskil lê in die keuse van kategorieë. So
kan sommige opvoedkundiges pedagogiese strukture en essensies
kategoriaal aanwend terwyl vir ander weer die Dooyeweerdiaanse
modaliteite kategoriale status het. Beide hierdie groepe denkers sal
die bedinking van opvoeding in terme van nie-menskundige kategorieë as
onwetenskaplik afwys vanweë die waardigheidskenende aard daarvan wat
daartoe lei dat menswees nie outentiek sigbaar kan word nie.
Die uitspraak wat so pas gemaak is, bring 'n mens uit by die volgende
sekerheid:
VIERDE SEKERHEID
Die teenwoordigheid (syn) van die opvoedingsverskynsel wat hom as
opvoedingsgebeure in opvoedingsituasies vertoon is slegs moontlik tussen
mense. Opvoeding is uitsluitlik 'n menslike gebeure. Hierdie stelling
beteken dat opvoedkundiges 'n mensbeskouing (antropologie) moet huldig
wat opvoeding moontlik maak. Dit is 'n beskouing wat stel dat slegs die
mens 'n wese is wat op opvoeding aangewese is en wat hom tot opvoeding
leen.
Dit is dus nie moontlik vir naturalistiese antropologiese konsepsies om
in die eenheid van die pedagogiek opgeneem te word nie.
Toelaatbare verskille is daarin geleë dat sommige opvoedkundiges 'n
keuse maak vir universele uitsprake oor die mens wat benoem word as
ontologies-antropologiese uitsprake met die klem op die wyses van in-die-wêreldwees van die mens waarvan opvoeding een van daardie wyses is.
Ander opvoedkundiges dring daarop aan dat hulle bedinking van die
opvoedingswerklikheid slegs geslaagd en vrugbaar kan wees indien daar
teen die agtergrond van 'n reformatoriese antropologie besinnende denke
beoefen kan word.
VYFDE SEKERHEID
Die eenheid van die pedagogiek (opvoedkunde) vereis dat daar tussen
opvoedkundiges 'n baie hoë mate van ooreenstemming moet wees ten aansien
van 'n opvoedingsdoel.
In die eerste plek moet aanvaar word dat alle opvoedende bedrywighede
teleologies van aard is. Dit beteken dat doelgerigtheid 'n inherente
eienskap is van die pedagogiese.
In die tweede plek bestaan 'n werkbare konsensus dat die opvoedingsdoel
as "behoorlike volwassenheid" beskryf kan word. Daar is wat die
opvoedingsdoel betref, toereikende ooreenstemming om die saak van die
eenheid van die pedagogiek te dien.
Pedagogiekers moet (in 'n reeks pedagogiekgesprekke) vir hulleself
duidelikheid kry of die volgende verskille eenheidskendend is of dat
hulle nie eenheidskendend is nie:
(i) volwassenheid as boonste grens van die opvoeding; en
(ii) opvoeding van die wieg tot die graf.
Gepaard hiermee gaan 'n beslissing oor die volgende moontlikhede:
(i) Opvoedkunde = Pedagogiek
(ii) Opvoedkunde = Pedagogiek + Andragogiek + Gerontogogiek.
o-O-o
|